రేవంత్తో ఎలాంటి గొడవ లేదు
రెండేళ్లుగా టీపీసీసీ అధ్యక్షుడిగా పార్టీని బూత్ స్థాయి వరకు బలోపేతం చేశాం
రాహుల్ గాంధీని ప్రధానిని చేయడమే లక్ష్యం.. భవిష్యత్లో తెలంగాణకు బీసీ సీఎం కాంగ్రెస్తోనే సాధ్యం
హైదరాబాద్: టీపీసీసీ అధ్యక్షుడు, ఎమ్మెల్సీ మహేష్ కుమార్ గౌడ్ తన రెండేళ్ల పదవీకాలంపై పలు కీలక వ్యాఖ్యలు చేశారు. సీఎల్పీలో నిర్వహించిన చిట్చాట్లో ఆయన మాట్లాడుతూ.. టీపీసీసీ అధ్యక్షుడిగా తన ప్రయాణం ఎంతో ఉత్సాహంగా సాగిందని, బాధ్యతను సంతృప్తిగా నిర్వహించానని తెలిపారు. కార్యకర్తలకు భరోసా కల్పిస్తూ పార్టీని బూత్ స్థాయి వరకు బలోపేతం చేశామని చెప్పారు.
సీఎం రేవంత్తో నా వేవ్లెంగ్త్ మ్యాచ్ అయింది
సీఎం రేవంత్ రెడ్డితో తన వేవ్లెంగ్త్ మ్యాచ్ అయిందని మహేష్ కుమార్ గౌడ్ అన్నారు. రెండేళ్లుగా పార్టీని సాఫీగా ముందుకు తీసుకెళ్లామని, చిన్నచిన్న ఇబ్బందులు వచ్చినా అవలీలగా అధిగమించామని చెప్పారు. రేవంత్ రెడ్డి, మీనాక్షి నటరాజన్, దీపాదాస్ మున్షీ సహకారంతో పార్టీని నడిపించామని తెలిపారు. సీఎం రేవంత్ రెడ్డితో తనకు ఎక్కడా గొడవ జరగలేదని, పార్టీలో అభిప్రాయ భేదాలు సహజమేనని స్పష్టం చేశారు. తమ మధ్య గ్యాప్ ఉందంటూ పత్రికల్లో వార్తలు వచ్చినా.. గొడవ మాత్రం లేదన్నారు. అభిప్రాయ భేదాలు వచ్చినా సాయంత్రానికే సరిచేసుకున్నామని చెప్పారు.
రాహుల్ గాంధీని ప్రధాని చేయడమే లక్ష్యం
సీఎం రేవంత్ రెడ్డితో కలిసి రాహుల్ గాంధీని ప్రధానిని చేయడమే తమ లక్ష్యమని మహేష్ కుమార్ గౌడ్ పేర్కొన్నారు. డీలిమిటేషన్ లేకపోతే తెలంగాణలోని 17 లోక్సభ స్థానాల్లో 17 సీట్లను కాంగ్రెస్ గెలిచేలా కృషి చేస్తామని అన్నారు. కేంద్రంలో కాంగ్రెస్ అధికారంలోకి రావడం ఖాయమని, అధికారంలోకి వచ్చిన వెంటనే దేశవ్యాప్తంగా కుల సర్వేను అమలు చేస్తామని చెప్పారు.
కుల సర్వేతో సామాజిక న్యాయం
తెలంగాణలో కుల సర్వే ద్వారా నిజమైన సామాజిక న్యాయం జరిగిందని మహేష్ కుమార్ గౌడ్ అన్నారు. రాహుల్ గాంధీ ఆశయానికి అనుగుణంగా కుల సర్వేను శాస్త్రీయంగా, సమర్థవంతంగా నిర్వహించిన సీఎం రేవంత్ రెడ్డికి ధన్యవాదాలు తెలిపారు. కుల సర్వేను కేంద్రం తొక్కిపెట్టడం దురదృష్టకరమన్నారు.
సర్పంచ్ ఎన్నికల్లో 57 శాతం వరకు బీసీలు విజయం సాధించారని, మున్సిపల్ ఎన్నికల్లో పార్టీ పరంగా బీసీలకు 50 శాతం సీట్లు ఇచ్చామని తెలిపారు. కేబినెట్లో 4–5 మంది బీసీలకు చోటు కల్పించాలని తాను డిమాండ్ చేస్తున్నానని చెప్పారు.
భవిష్యత్లో తెలంగాణకు బీసీ సీఎం
భవిష్యత్లో తెలంగాణకు బీసీ సీఎం అయ్యే అవకాశం కాంగ్రెస్తోనే ఉందని మహేష్ కుమార్ గౌడ్ అన్నారు. ప్రస్తుతం బీసీ సీఎం లేకపోయినా.. భవిష్యత్లో ఎప్పుడైనా బీసీ సీఎం కావడం ఖాయమని వ్యాఖ్యానించారు. బీజేపీ కనీసం రాష్ట్ర అధ్యక్షుడిగా కూడా బీసీని చేయలేదని విమర్శించారు. బీసీ సీఎం చేస్తామని చెబుతున్న బీజేపీని ఎలా నమ్మాలని ప్రశ్నించారు.
తనకు మంత్రి పదవి ఇవ్వాలని తాను ఎవరినీ సంప్రదించలేదని, కాంగ్రెస్లో పదవులు కోరుకుంటే రావని.. మనం చేసే పనిని బట్టి పదవులు వస్తాయని అన్నారు.
క్రమశిక్షణ విషయంలో రాజీ లేదు
బీసీ మంత్రి సురేఖను తొలగించిన సమయంలో తాను కూడా బాధపడ్డానని మహేష్ కుమార్ గౌడ్ తెలిపారు. సురేఖపై చర్యలు ఏఐసీసీ నిర్ణయం మేరకే తీసుకున్నామని చెప్పారు. క్రమశిక్షణ తప్పి హద్దు దాటితే ఎవరిపైనైనా చర్యలు తప్పవని స్పష్టం చేశారు. క్రమశిక్షణ విషయంలో కఠినంగా వ్యవహరించాలని ఏఐసీసీ నిర్ణయించిందన్నారు.
ఈ నెలాఖరులోపు వర్కింగ్ ప్రెసిడెంట్ల నియామకం
ఈ నెలాఖరులోపు వర్కింగ్ ప్రెసిడెంట్ల నియామకాలను పూర్తి చేస్తామని మహేష్ కుమార్ గౌడ్ వెల్లడించారు. ఏఐసీసీ ఆదేశాలతో జిల్లా కాంగ్రెస్ అధ్యక్షుల ఎంపికలో కొత్త విధానాన్ని అమలు చేశామని, ఢిల్లీ నుంచి అబ్జర్వర్లను పంపించి సమీక్షించిన తర్వాత డీసీసీ అధ్యక్షులను ప్రకటించామని తెలిపారు.
సొసైటీ నియామకాల్లో మండల అధ్యక్షుల నిర్ణయానికే ప్రాధాన్యం ఇచ్చామని చెప్పారు. ఎమ్మెల్యే టికెట్ల విషయంలో డీసీసీ అధ్యక్షుల అభిప్రాయం కీలకమని, పీఏసీలో టికెట్పై చర్చకు ముందే డీసీసీ అధ్యక్షుడి అభిప్రాయం తీసుకుంటామని తెలిపారు. ఎమ్మెల్యేగా పోటీ చేయాలనుకునే వారు తప్పనిసరిగా డీసీసీ అధ్యక్షుడిని కలవాలని సూచించారు. నామినేటెడ్ పదవుల భర్తీలోనూ డీసీసీ అధ్యక్షుల అభిప్రాయం తీసుకుంటున్నామని చెప్పారు.
ఫోర్త్ సిటీపై అసత్య ప్రచారం
ఫోర్త్ సిటీ రేపోమాపో పూర్తయ్యే ప్రాజెక్టు కాదని మహేష్ కుమార్ గౌడ్ అన్నారు. ఫోర్త్ సిటీపై హరీశ్ రావు వంటి వారు అసత్య ప్రచారాలు చేస్తున్నారని విమర్శించారు. మూసీ ప్రాజెక్టు లక్ష కోట్ల ప్రాజెక్టు కాదని, దానిపై కూడా తప్పుడు ప్రచారం చేస్తున్నారని అన్నారు.
హైడ్రాపై గతంలో చేసిన తప్పుడు ప్రచారాన్నే ఇప్పుడు మూసీపై చేస్తున్నారని ఆరోపించారు. మూసీ పరివాహక ప్రాంతంలో పేదలు నివసిస్తున్నారని, గతంలో మాదిరిగా వరదలు రాకుండా మూసీ సుందరీకరణ అవసరమని చెప్పారు. మూసీ సుందరీకరణతో విదేశీ పెట్టుబడులు వచ్చే అవకాశం ఉందన్నారు.
ఏఐతో ఏది నిజమో.. ఏది అబద్ధమో తెలియని పరిస్థితి
ఏఐ టెక్నాలజీని మంచికంటే చెడుకే ఎక్కువగా ఉపయోగిస్తున్నారని మహేష్ కుమార్ గౌడ్ అన్నారు. ప్రస్తుతం ఏది నిజమో, ఏది అబద్ధమో తెలియని పరిస్థితి ఉందని పేర్కొన్నారు. బీజేపీ, బీఆర్ఎస్ రెండు పార్టీలు ఏఐ టెక్నాలజీని తప్పుగా ఉపయోగిస్తున్నాయని ఆరోపించారు. ఇలాంటి రాజకీయాలు ఎక్కువ కాలం మనుగడ సాగించలేవన్నారు.
కేసీఆర్ సీఎంగా ఫెయిల్ అయ్యారు
ఉద్యమ నాయకుడిగా కేసీఆర్ను గౌరవిస్తానని, అయితే సీఎంగా కేసీఆర్ విఫలమయ్యారని మహేష్ కుమార్ గౌడ్ వ్యాఖ్యానించారు. తెలంగాణలో జరుగుతున్న సంక్షేమం మరే రాష్ట్రంలోనూ జరగడం లేదని అన్నారు. కాంగ్రెస్ గ్రౌండ్లో బలంగా ఉందని ధీమా వ్యక్తం చేశారు.
22-ఏపై కీలక వ్యాఖ్యలు
22-ఏ ఎక్కడ ప్రారంభమైంది, ఎవరు తీసుకొచ్చారో పూర్తిగా చదివితే అసలు విషయం అర్థమవుతుందని మహేష్ కుమార్ గౌడ్ అన్నారు. సామాన్యులకు ఇబ్బంది కలగకుండా చర్యలు తీసుకోవడం తమ బాధ్యతని చెప్పారు. ప్లాట్ కొనుగోలు చేసిన వ్యక్తిది తప్పు కాదని, నిషేధిత జాబితాలో ఉన్న విషయం తెలిసినా వెంచర్ వేసిన వారిపై చర్యలు తీసుకోవాలని స్పష్టం చేశారు.
#MaheshKumarGoud #TPCC #TelanganaCongress #RevanthReddy #TelanganaPolitics #RahulGandhi #BCCM #CasteSurvey #TelanganaNews #FourthCity #MusiProject #KCR #BRS #HarishRao #HyderabadNews #VSRBreakingNews
