కేటీఆర్..గడ్డం పెంచుకుంటే రేవంత్ రెడ్డివి కాలేవు..
కొడంగల్: కొడంగల్‌ను ఎడ్యుకేషన్ హబ్‌గా, పారిశ్రామిక కేంద్రంగా అభివృద్ధి చేసి దేశానికే ఆదర్శంగా తీర్చిదిద్దుతామని ముఖ్యమంత్రి రేవంత్ రెడ్డి ప్రకటించారు. ఆదర్శ రైతులు, వ్యవసాయ శాస్త్రవేత్తలతో నిర్వహించిన ముఖాముఖి కార్యక్రమంలో సీఎం మాట్లాడారు. రాబోయే ఎల్‌నినో ప్రభావంతో కరువు పరిస్థితులు ఏర్పడే అవకాశం ఉన్నందున రైతులు ఆరుతడి పంటలు సాగు చేయాలని సూచించారు. రైతుల మేలు కోరే ప్రభుత్వంగా వారికి అండగా నిలుస్తామని భరోసా ఇచ్చారు.బూర్గుల రామకృష్ణారావు హైదరాబాద్ రాష్ట్రానికి మొట్టమొదటి ముఖ్యమంత్రిగా సేవలందించారని గుర్తుచేసిన రేవంత్ రెడ్డి, పాలమూరు జిల్లాకు గతంలో అనేక అవకాశాలు వచ్చినప్పటికీ ఆశించిన స్థాయిలో అభివృద్ధి జరగలేదన్నారు. తెలంగాణ వస్తే పాలమూరు అభివృద్ధి చెందుతుందని ఆశించి 2009లో ప్రజలు కేసీఆర్‌ను పార్లమెంట్‌కు పంపారని పేర్కొన్నారు.కల్వకుర్తి, భీమా, నెట్టెంపాడు, కోయిల్‌సాగర్, మక్తల్–కొడంగల్–నారాయణపేట ఎత్తిపోతల ప్రాజెక్టులు పూర్తవుతాయని ఈ ప్రాంత ప్రజలు ఆశించారని చెప్పారు. 2014లో కాంగ్రెస్ ప్రభుత్వం ఏర్పడి ఉంటే ఈ ప్రాజెక్టులు పూర్తయ్యేవని వ్యాఖ్యానించారు. పదేళ్లు ముఖ్యమంత్రిగా కొనసాగిన కేసీఆర్ పాలమూరు జిల్లాలో ఒక్క ప్రాజెక్టును కూడా పూర్తి చేయలేదని విమర్శించారు.
కాళేశ్వరం ప్రాజెక్టుపై విమర్శలు
కేంద్ర ప్రభుత్వం జాతీయ ప్రాజెక్టు ఇస్తామని చెప్పినా ప్రాణహిత ప్రాజెక్టును పక్కనపెట్టి కాళేశ్వరం నిర్మించారని సీఎం విమర్శించారు. పేరు, ఊరు, అంచనాలు మార్చారని ఆరోపించారు. కాళేశ్వరం ప్రాజెక్టు నిర్మాణంలో అవకతవకలపై తమ ప్రభుత్వం సీబీఐ విచారణకు ఆదేశిస్తే, విచారణ ఆలస్యం చేయాలని ఢిల్లీకి వెళ్లి కోరింది మీరే కాదా అని బీఆర్ఎస్ నాయకులను ప్రశ్నించారు.మేడిగడ్డ బ్యారేజీ కూలిన పరిస్థితికి గత ప్రభుత్వ అవినీతి, కాసుల కక్కుర్తే కారణమని ఆరోపించారు. కరువు పరిస్థితుల్లో కాళేశ్వరం నుంచి చుక్క నీరు కూడా అందించలేని పరిస్థితి ఏర్పడిందని అన్నారు. మేడిగడ్డ పేరెత్తితే బీఆర్ఎస్ నేతలు ఎందుకు భయపడుతున్నారని ప్రశ్నించారు.
ఎల్‌నినో, కాళేశ్వరం, గోదావరి జలాలపై చర్చకు విజ్ఞప్తి
ఎల్‌నినో ప్రభావం, కాళేశ్వరం ప్రాజెక్టు, గోదావరి జలాల అంశాలపై డిసెంబర్‌లో రెండు రోజులపాటు అసెంబ్లీలో చర్చకు అనుమతి ఇవ్వాలని స్పీకర్‌ను సీఎం కోరారు. కేసీఆర్‌తో పాటు ఆయన కుటుంబ సభ్యులు కూడా చర్చకు రావాలని, అన్ని విషయాలపై నిజాలు ప్రజల ముందు వెల్లడిస్తామని అన్నారు.దేవాదుల ప్రాజెక్టు ద్వారా సీతారామ ప్రాజెక్టుకు నీటిని అందించి ఖమ్మం జిల్లా రైతులకు సాగునీరు అందిస్తున్నామని వివరించారు. తుపాకులగూడెం వద్ద దేవాదుల ప్రాజెక్టు ద్వారా లక్షలాది ఎకరాలకు నీరు అందుతోందని పేర్కొన్నారు.
కొడంగల్ అభివృద్ధికి రూ.10 వేల కోట్లతో పనులు
తమ ప్రభుత్వం ఏర్పడిన తర్వాత మక్తల్–నారాయణపేట ఎత్తిపోతల పథకం పనులు వేగంగా జరుగుతున్నాయని సీఎం తెలిపారు. గతంలో భూసేకరణ పరిహారం ఎకరానికి రూ.2 లక్షలు కూడా ఇవ్వలేదని, తమ ప్రభుత్వం రైతులకు ఎకరానికి రూ.20 లక్షలు ఇచ్చిందని పేర్కొన్నారు.హైదరాబాద్ విమానాశ్రయం నుంచి కొడంగల్‌లోని కవచర్ల ఇండస్ట్రియల్ పార్క్ వరకు అభివృద్ధి కార్యక్రమాలు చేపడతామని చెప్పారు. కొడంగల్‌ను ఎడ్యుకేషన్ హబ్‌గా, RARE ఎడ్యుకేషన్ హబ్, RARE ఇండస్ట్రియల్ పార్కులను అభివృద్ధి చేస్తామని ప్రకటించారు. తాండూరు పప్పును ప్రపంచ దేశాలకు ఎగుమతి చేసేలా ఈ ప్రాంతాన్ని తీర్చిదిద్దుతామని తెలిపారు.కొడంగల్ అభివృద్ధి కోసం రూ.10 వేల కోట్లతో మరిన్ని అభివృద్ధి పనులను ప్రారంభించబోతున్నామని వెల్లడించారు. రాజకీయాలకు అతీతంగా మూడేళ్లలో నియోజకవర్గంలోని సమస్యలను పరిష్కరించేందుకు ప్రయత్నిస్తున్నానని చెప్పారు.
కేటీఆర్‌పై సీఎం రేవంత్ రెడ్డి వ్యాఖ్యలు
తనను చూసి కొందరు గడ్డం పెంచుకుంటున్నారని వ్యాఖ్యానించిన సీఎం రేవంత్ రెడ్డి, గడ్డం పెంచుకున్నంత మాత్రాన రేవంత్ రెడ్డి కాలేరని అన్నారు. కార్యకర్తలను గుండెల్లో పెట్టుకుని చూసుకునే ధైర్యం, నమ్మినవారి కోసం నిలబడే తెగువ ఉండాలని వ్యాఖ్యానించారు. వేషాలు, భాషలు మార్చినా ప్రజల నమ్మకం పొందాలంటే ఆలోచనా విధానం మారాలని అన్నారు.ఎల్‌నినో ప్రభావంతో కరువు వచ్చే అవకాశం ఉన్నందున రైతులు ఆరుతడి పంటలు సాగు చేయాలని రేవంత్ రెడ్డి పిలుపునిచ్చారు. బావ, బామ్మర్దులు చెప్పే మాటలు విని నష్టపోవద్దని, రైతులు జాగ్రత్తగా ఆలోచించి పంటలు వేసుకోవాలని సూచించారు. ప్రభుత్వం రైతుల మేలు కోరుతోందని, వారికి అండగా నిలుస్తుందని భరోసా ఇచ్చారు.సంక్రాంతి తర్వాత ప్రజా బలం కార్యక్రమం ద్వారా ప్రతి గ్రామానికి వచ్చి ప్రజలను కలుస్తానని తెలిపారు. ఎల్‌నినో కరువును అందరం కలిసికట్టుగా ఎదుర్కొందామని ముఖ్యమంత్రి పిలుపునిచ్చారు.
#CMRevanthReddy #Kodangal #KodangalRythuMela #TelanganaNews #TelanganaFarmers #ElNino #Kaleshwaram #DevadulaProject #KodangalDevelopment
