కేటీఆర్.. కాచుకో.. సిరిసిల్లకు రేవంత్ రెడ్డి వస్తున్నారు: ఆది శ్రీనివాస్

హైదరాబాద్: సీఎం రేవంత్ రెడ్డి సిరిసిల్ల పర్యటన, భారీ బహిరంగ సభపై ప్రభుత్వ విప్ ఆది శ్రీనివాస్ కీలక వ్యాఖ్యలు చేశారు. సీఎం రేవంత్ రెడ్డి సిరిసిల్ల సభ కేటీఆర్‌ను కంగారుపెడుతోందని ఆయన వ్యాఖ్యానించారు. సిరిసిల్లలో సీఎం రేవంత్ రెడ్డి అడుగుపెడితే గతంలో జరిగిన విషయాలు, స్థానిక సమస్యలు ప్రజల ముందుకు వస్తాయని అన్నారు.“కేటీఆర్.. కాచుకో.. సిరిసిల్లలో నిన్ను పాతాళంలో తొక్కడానికి విష్ణుమూర్తి అవతారంలో మా రేవంత్ రెడ్డి వస్తున్నారు” అని ఆది శ్రీనివాస్ వ్యాఖ్యానించారు. సిరిసిల్లలో మొదటి అడుగు కేటీఆర్‌పై, రెండో అడుగు సిద్ధిపేటలో హరీష్ రావుపై, మూడో అడుగు గజ్వేల్‌లో కేసీఆర్‌పై పడబోతుందని అన్నారు.

సిరిసిల్లకు కేటీఆర్ ఏం చేశారో, ప్రజలకు ఎంత అన్యాయం జరిగిందో సీఎం రేవంత్ రెడ్డి సభ ద్వారా వివరిస్తామని ఆది శ్రీనివాస్ తెలిపారు. నేతన్నలకు రూ.300 కోట్ల బకాయిలు పెట్టారని, సిరిసిల్లకు యార్న్ డిపో తీసుకురాలేకపోయారని ఆయన ఆరోపించారు. సిరిసిల్లను జిల్లాగా ఏర్పాటు చేయలేకపోయానని క్షమాపణ చెబుతూ గతంలో బహిరంగ లేఖ రాసింది కేటీఆర్ కాదా అని ప్రశ్నించారు.

వేములవాడ రాజన్న ఆలయానికి ఏటా రూ.100 కోట్లు ఇస్తామని చెప్పి ఒక్క రూపాయి కూడా ఇవ్వలేదని ఆది శ్రీనివాస్ ఆరోపించారు. రాజన్న ఆలయానికి అన్యాయం చేశారని విమర్శించారు.సిరిసిల్లలో ఇన్నేళ్లు అభివృద్ధి జరిగితే సమస్యలు ఇంకా ఎందుకు కొనసాగుతున్నాయని ఆది శ్రీనివాస్ ప్రశ్నించారు. సీఎం రేవంత్ రెడ్డి సభ ద్వారా సిరిసిల్ల ప్రజలకు గతంలో జరిగిన అన్యాయాన్ని వివరిస్తామని అన్నారు.తెలంగాణ ఉద్యమాన్ని అడ్డం పెట్టుకుని సంపాదించారనే ఆరోపణలపై కవిత, రమ్యారావు చేసిన వ్యాఖ్యలకు సమాధానం చెప్పాలని ఆయన డిమాండ్ చేశారు. సిరిసిల్లలో లక్ష మందితో భారీ బహిరంగ సభ నిర్వహించబోతున్నామని, సభ విజయవంతం అవుతుందని అన్నారు.

నేతన్నలకు భారీగా పని కల్పించాం

కాంగ్రెస్ ప్రభుత్వం నేతన్నలకు చేతినిండా పని కల్పిస్తోందని ఆది శ్రీనివాస్ తెలిపారు. 6 కోట్ల 96 లక్షల మీటర్ల చీరలు, స్కూల్ డ్రెస్‌ల ద్వారా నేతన్నలకు పని కల్పించామని చెప్పారు. ఈ ఏడాది ఇప్పటికే 4 కోట్ల 29 లక్షల మీటర్ల మేర పని కల్పించామని పేర్కొన్నారు.రాజన్న సిరిసిల్ల జిల్లాకు ఇప్పటివరకు రూ.1,000 కోట్ల నిధులను తీసుకువచ్చి అభివృద్ధి పనులు చేపడుతున్నామని తెలిపారు. భవిష్యత్తులో మరిన్ని నిధులను సీఎం రేవంత్ రెడ్డి మంజూరు చేస్తారని అన్నారు.సిరిసిల్లలో యంగ్ ఇండియా ఇంటిగ్రేటెడ్ స్కూల్, తెలంగాణ పబ్లిక్ స్కూల్ ఏర్పాటు చేయబోతున్నట్లు ఆది శ్రీనివాస్ వెల్లడించారు.

గత ప్రభుత్వంపై ఆర్థిక ఆరోపణలు

తెలంగాణ ఏర్పడిన సమయంలో రూ.16 వేల కోట్ల మిగులు బడ్జెట్ ఉందని, అనంతరం రూ.8 లక్షల కోట్ల అప్పులు చేశారని ఆది శ్రీనివాస్ ఆరోపించారు. ప్రస్తుతం నెలకు రూ.6 వేల కోట్లు, ఏడాదికి రూ.72 వేల కోట్లను వడ్డీగా చెల్లిస్తున్నామని తెలిపారు.ఆర్థిక ఇబ్బందులు ఉన్నప్పటికీ ప్రభుత్వం అనేక సంక్షేమ, అభివృద్ధి కార్యక్రమాలను చేపడుతోందని అన్నారు. ప్రజలు విజ్ఞులని, రాబోయే రోజుల్లో కూడా కాంగ్రెస్ ప్రభుత్వానికి మద్దతుగా నిలుస్తారని ఆది శ్రీనివాస్ పేర్కొన్నారు.

#CMRevanthReddy #RevanthReddy #AdiSrinivas #KTR #Sirisilla #Sircilla #TelanganaPolitics #TelanganaCongress #Congress #SirisillaNews #RajannaSircilla #TelanganaNews #RevanthReddySirisilla #SircillaWeavers #VSRBreakingNews