కృష్ణా జలాలు విడుదల చేయండి.. కర్ణాటక సీఎంకు తెలంగాణ మంత్రుల విజ్ఞప్తి

బెంగళూరు: దక్షిణ తెలంగాణలోని రైతుల ప్రయోజనాలను కాపాడేందుకు కృష్ణా నది నుంచి సాగునీటిని విడుదల చేయాలని కోరుతూ తెలంగాణ మంత్రులు వాకిటి శ్రీహరి, జూపల్లి కృష్ణారావు, ఎమ్మెల్యేలు బండ్ల కృష్ణమోహన్ రెడ్డి, మేఘారెడ్డి, మధుసూదన్ రెడ్డిల బృందం కర్ణాటక ముఖ్యమంత్రి డీకే శివకుమార్‌తో భేటీ అయ్యింది.జూరాల, భీమా, నెట్టెంపాడు, కోయిల్‌సాగర్ ఆయకట్టు పరిధిలో పంటలు కీలక దశలో ఉన్నందున కర్ణాటక నుంచి కృష్ణా జలాలను విడుదల చేయాల్సిన అవసరాన్ని తెలంగాణ ప్రతినిధి బృందం డీకే శివకుమార్ దృష్టికి తీసుకెళ్లింది.ఈ నాలుగు సాగునీటి పథకాల పరిధిలో సుమారు 5.5 లక్షల ఎకరాల ఆయకట్టు ఉందని, వేలాది రైతు కుటుంబాలు వ్యవసాయంపైనే ఆధారపడి జీవిస్తున్నాయని ప్రతినిధి బృందం వివరించింది. ప్రస్తుత సమయంలో నీటి కొరత ఏర్పడితే పంట దిగుబడులు, రైతుల ఆదాయంపై ప్రభావం పడే అవకాశం ఉందని తెలిపింది.

5,000 క్యూసెక్కులు.. నెల రోజుల పాటు

ప్రస్తుత పంటలను కాపాడేందుకు కృష్ణా నది నుంచి 5,000 క్యూసెక్కుల నీటిని ఒక నెల రోజుల పాటు నిరంతరాయంగా విడుదల చేయాలని కర్ణాటక సీఎంను తెలంగాణ మంత్రులు, ఎమ్మెల్యేలు కోరారు. కీలక దశలో ఉన్న పంటలకు సకాలంలో నీరు అందితే రైతులకు మేలు జరుగుతుందని వివరించారు.కృష్ణా పరివాహక ప్రాంతంలో మిగిలిన రుతుపవన కాలంలో మరిన్ని వర్షాలు కురిసే అవకాశం ఉన్నందున, ప్రస్తుతం నియంత్రిత పద్ధతిలో నీటిని విడుదల చేస్తే అందుబాటులో ఉన్న నీటిని సమర్థవంతంగా వినియోగించుకోవచ్చని ప్రతినిధి బృందం తెలిపింది.రైతుల పంటలు, జీవనోపాధిని కాపాడటమే ప్రధాన లక్ష్యంగా కర్ణాటక ముఖ్యమంత్రితో భేటీ జరిగినట్లు తెలంగాణ ప్రతినిధులు తెలిపారు. పొరుగు రాష్ట్రాల మధ్య సహకార స్ఫూర్తితో కర్ణాటక ప్రభుత్వం సానుకూలంగా స్పందించి నీటి విడుదలకు చర్యలు తీసుకోవాలని విజ్ఞప్తి చేశారు.