దక్షిణాది రాష్ట్రాల మధ్య సమన్వయంతో నేరాల నియంత్రణ.. ముఖ్యమంత్రి రేవంత్ రెడ్డి

పోలీసు వ్యవస్థపై పెట్టేది ఖర్చు కాదు.. మెరుగైన సమాజ నిర్మాణం కోసం పెట్టుబడి..

తెలంగాణ పోలీసులకు జాతీయ స్థాయిలో ప్రశంసలు..

పోలీసుల సంక్షేమం కోసం కట్టుబడి ఉన్నాం..

దక్షిణ భారత దేశ పోలీసు ఉన్నతాధికారుల సమన్వయ కమిటీ సమావేశంలో సీఎం రేవంత్ రెడ్డి**

హైదరాబాద్, అక్టోబర్ 23 : పోలీసు వ్యవస్థ కోసం వినియోగించే నిధులు ఖర్చు కాదని, మెరుగైన సమాజ నిర్మాణానికి, పౌరుల భద్రతకు చేసే పెట్టుబడి అని ముఖ్యమంత్రి ఎ. రేవంత్ రెడ్డి అన్నారు. మారుతున్న నేరాల స్వరూపానికి అనుగుణంగా పోలీసింగ్ విధానాల్లో నిరంతర సంస్కరణలు అవసరమని పేర్కొన్నారు. పోలీస్ కమాండ్ కంట్రోల్ సెంటర్‌లో దక్షిణ భారత దేశ పోలీసు ఉన్నతాధికారుల సమన్వయ కమిటీ ప్రారంభ సమావేశంలో ముఖ్యమంత్రి పాల్గొన్నారు. దక్షిణాది రాష్ట్రాల పోలీసు విభాగాల మధ్య సమన్వయం, ఆధునిక సాంకేతిక పరిజ్ఞానం వినియోగం, పోలీసుల సంక్షేమంపై ఆయన ఈ సందర్భంగా వివరించారు. దక్షిణాది రాష్ట్రాలు, కేంద్రపాలిత ప్రాంతాలకు చెందిన డైరెక్టర్ జనరల్ ఆఫ్ పోలీస్‌లు, సీనియర్ పోలీసు అధికారులు ఈ సమావేశంలో పాల్గొన్నారు. SRPCC సదస్సు హైదరాబాద్‌లో నిర్వహించడం గర్వకారణమని ముఖ్యమంత్రి రేవంత్ రెడ్డి అన్నారు. ఈ వేదిక రాష్ట్రాల పోలీసు విభాగాలు, ప్రత్యేక విభాగాల మధ్య సమన్వయాన్ని పెంపొందించేందుకు దోహదపడుతుందని పేర్కొన్నారు.

మూడు కమిషనరేట్లుగా హైదరాబాద్ పోలీసు వ్యవస్థ..

హైదరాబాద్ పోలీసు వ్యవస్థను హైదరాబాద్, సైబరాబాద్, మల్కాజిగిరి మూడు కమిషనరేట్లుగా విభజించినట్లు సీఎం తెలిపారు. దీనివల్ల ప్రతి కమిషనర్ తన పరిధిలోని ప్రాంతంపై ప్రత్యేక దృష్టి సారించి మెరుగైన ఫలితాలు సాధించేందుకు అవకాశం కలుగుతుందన్నారు. నేరాల స్వరూపం మారుతున్న నేపథ్యంలో పోలీసింగ్ విధానాలు కూడా మారాలని, సంస్కరణలు నిరంతర ప్రక్రియగా కొనసాగాలని పేర్కొన్నారు. నేరాల నియంత్రణ కోసం హైడ్రా, ఈగల్, టీ సేఫ్ వంటి ప్రత్యేక విభాగాలను ఏర్పాటు చేసినట్లు వివరించారు. సైబర్ నేరాలు, మాదకద్రవ్యాల అక్రమ రవాణా, ట్రాఫిక్ సమస్యలపై ప్రత్యేక దృష్టి సారించాలని సూచించారు. ప్రతి విభాగం సాంకేతిక పరిజ్ఞానం, సిబ్బందికి శిక్షణ ద్వారా సామర్థ్యాన్ని పెంచుకోవాలని అన్నారు.

సైబర్ నేరాల నియంత్రణలో తెలంగాణకు గుర్తింపు

మాదకద్రవ్యాల నియంత్రణ, సైబర్ నేరాల నివారణ, నక్సలిజం నిర్మూలన వంటి రంగాల్లో తెలంగాణ పోలీసు శాఖ జాతీయ స్థాయిలో గుర్తింపు పొందుతోందని సీఎం పేర్కొన్నారు. ప్రధానమంత్రి నిర్వహించిన ప్రగతి సమీక్ష సందర్భంగా సైబర్ నేరాల నియంత్రణలో తెలంగాణ దేశంలో మొదటి స్థానంలో నిలిచిందని తెలిపారు. తెలంగాణను నక్సల్స్ రహిత రాష్ట్రంగా మార్చేందుకు కృషి చేసిన పోలీసు అధికారులను కేంద్ర హోంమంత్రి అమిత్ షా అభినందించారని గుర్తుచేశారు. మాదకద్రవ్యాల నియంత్రణలో ఈగల్ విభాగానికి కేంద్ర ప్రభుత్వం నుంచి 80 శాతానికి పైగా మార్కులు లభించాయని చెప్పారు. సైబర్ నేరాల్లో బాధితులు కోల్పోయిన డబ్బును తిరిగి ఇప్పించే విషయంలో తెలంగాణ సైబర్ సెక్యూరిటీ బ్యూరో ప్రత్యేక ప్రమాణాలు నెలకొల్పిందని ముఖ్యమంత్రి రేవంత్ రెడ్డి అన్నారు.

ఆహార కల్తీని అరికట్టడం, ఔషధాల నియంత్రణలో వివిధ విభాగాల చర్యలను సమన్వయం చేసేందుకు అమెరికాలోని ఎఫ్‌డీఏ తరహాలో టీజీ సేఫ్ విభాగాన్ని ప్రారంభించినట్లు వివరించారు. చెరువులు, సరస్సులు, ఇతర జలవనరుల పరిరక్షణతో పాటు ప్రభుత్వ, ప్రజా ఆస్తుల రక్షణలో హైడ్రా పనిచేస్తోందన్నారు. హైదరాబాద్ ట్రాఫిక్ పోలీసు విభాగంలో ట్రాన్స్‌జెండర్లను ట్రాఫిక్ అసిస్టెంట్లుగా నియమించిన దేశంలోనే తొలి రాష్ట్రంగా తెలంగాణ నిలిచిందని సీఎం తెలిపారు.

పోలీసుల కుటుంబాల సంక్షేమానికి ప్రాధాన్యం

పోలీసుల సంక్షేమం, వారి కుటుంబాల భవిష్యత్తు ప్రభుత్వ ప్రాధాన్యాల్లో ఒకటని సీఎం రేవంత్ రెడ్డి అన్నారు. ప్రజల భద్రత కోసం పోలీసులు నిరంతరం పనిచేస్తూ, విధి నిర్వహణలో ప్రాణాలను సైతం త్యాగం చేస్తున్నారని పేర్కొన్నారు. వారి పిల్లలకు నాణ్యమైన విద్య అందించేందుకు దేశంలోని అత్యుత్తమ సైనిక్ పాఠశాలలకు దీటుగా యంగ్ ఇండియా పోలీస్ స్కూల్‌ను ఏర్పాటు చేసినట్లు తెలిపారు. హోంగార్డు నుంచి డీజీపీ వరకు పోలీసు సిబ్బంది పిల్లలు ఈ పాఠశాలలో చదువుకునే అవకాశం ఉంటుందని వివరించారు. విధి నిర్వహణలో ప్రాణాలు కోల్పోయిన పోలీసు సిబ్బందికి వారి హోదా, సర్వీసు ఆధారంగా కనీసం రూ.కోటి నుంచి గరిష్ఠంగా రూ.2 కోట్ల వరకు ఎక్స్‌గ్రేషియా అందజేస్తున్నామని ముఖ్యమంత్రి రేవంత్ రెడ్డి తెలిపారు. బాధిత కుటుంబాలకు గృహ నిర్మాణ స్థలాలు కేటాయించడంతో పాటు అర్హులైన కుటుంబ సభ్యులకు కారుణ్య నియామకాల కింద ఉద్యోగాలు కల్పించేలా చర్యలు తీసుకుంటున్నట్లు వెల్లడించారు.

రాష్ట్రాల మధ్య సమన్వయంతోనే నేరాల నియంత్రణ

ఏ ఒక్క రాష్ట్రం తన ప్రయత్నాలతో మాత్రమే నేరాలను పూర్తిగా నియంత్రించడం సాధ్యం కాదని సీఎం అన్నారు. అన్ని రాష్ట్రాల పోలీసు విభాగాల మధ్య సమన్వయం అవసరమని పేర్కొన్నారు. SRPCC సదస్సులో విస్తృతంగా చర్చించి పటిష్టమైన కార్యాచరణ ప్రణాళిక రూపొందించాలని ప్రతినిధులకు సూచించారు. దక్షిణ భారతదేశాన్ని సురక్షిత ప్రాంతంగా తీర్చిదిద్దేందుకు రాష్ట్రాల పోలీసు ప్రధాన కార్యాలయాల మధ్య సరిహద్దులు దాటి సమన్వయం పెంపొందించే వ్యవస్థలను ఏర్పాటు చేయాలని అన్నారు. పొరుగు రాష్ట్రాలతో సాంకేతిక మౌలిక సదుపాయాలను, ఇంటిగ్రేటెడ్ కమాండ్ అండ్ కంట్రోల్ సెంటర్ (ICCC) వ్యవస్థను పంచుకునేందుకు తెలంగాణ ప్రభుత్వం సిద్ధంగా ఉందని తెలిపారు. అన్ని రాష్ట్రాలు కలిసి పనిచేస్తే దక్షిణ భారతదేశంలో ప్రజలకు మరింత మెరుగైన భద్రత కల్పించవచ్చని సీఎం రేవంత్ రెడ్డి ఆశాభావం వ్యక్తం చేశారు.

సమావేశంలో తెలంగాణ డీజీపీ సీవీ ఆనంద్, కర్ణాటక డీజీపీ డాక్టర్ ఎం.ఏ. సలీమ్, తమిళనాడు డీజీపీ డాక్టర్ మహేష్ అగర్వాల్, పుదుచ్చేరి డీజీపీ శ్రీమతి షాలిని సింగ్, లక్షద్వీప్ ఏడీజీ బి. శంకర్ జైస్వాల్, కేరళ ఐజీ అజీతా బేగం, ఆంధ్రప్రదేశ్ ఐజీపీ రవి కృష్ణ, ఈగల్ డైరెక్టర్ సందీప్ శాండిల్య, తెలంగాణ సైబర్ సెక్యూరిటీ బ్యూరో (TGCSB) డైరెక్టర్ శిఖా గోయల్, తెలంగాణ పోలీస్ అకాడమీ (TGPA) డైరెక్టర్ అభిలాష బిష్ట్, లా అండ్ ఆర్డర్ డీజీ మహేష్ భగవత్, సీఐడీ డీజీ చారు సిన్హా, హైదరాబాద్ పోలీస్ కమిషనర్ సజ్జనార్, ఆపరేషన్స్ విభాగం డీజీ అనిల్ కుమార్, ఇతర పోలీసు ఉన్నతాధికారులు పాల్గొన్నారు.

#RevanthReddy #SRPCC #TelanganaPolice #PoliceCoordination #CrimeControl #CyberCrime #DrugControl #HYDRAA #EAGLE #TelanganaNews #HyderabadNews #VSRBreakingNews