తెలంగాణ | VSR BREAKING NEWS

శ్రీశైలం ఎడమగట్టు కాలువ (ఎస్‌ఎల్‌బీసీ) సొరంగం పనుల్లో కీలక పురోగతి సాధించినట్లు రాష్ట్ర నీటిపారుదల, పౌరసరఫరాల శాఖ మంత్రి ఎన్‌. ఉత్తమ్‌ కుమార్‌రెడ్డి వెల్లడించారు. గతంలో ప్రమాదం జరిగిన ప్రాంతంలోని అత్యంత క్లిష్టమైన భూగర్భ పరిస్థితులను అధిగమించి, బలహీన శిలల మండలం (షియర్‌ జోన్‌)ను జాగ్రత్తగా దాటినట్లు తెలిపారు. దీంతో సొరంగం పనులను మరింత వేగవంతం చేసేందుకు మార్గం సుగమమైందని పేర్కొన్నారు.

ఉమ్మడి నల్లగొండ జిల్లాలోని కీలక నీటిపారుదల ప్రాజెక్టుల అమలుపై ప్రజాప్రతినిధులు, ఉన్నతాధికారులతో మంత్రి సుదీర్ఘ సమీక్ష నిర్వహించారు. ఎస్‌ఎల్‌బీసీ సొరంగం పనుల పురోగతి, ఎదురవుతున్న సాంకేతిక సమస్యలు, అదనపు యంత్రాల వినియోగం, కార్మికుల భద్రత తదితర అంశాలపై చర్చించారు.

గత ఐదారు నెలల్లో 700 మీటర్ల మేర తవ్వకాలు

గత ఐదారు నెలల్లో ఎస్‌ఎల్‌బీసీ సొరంగం తవ్వకాలు సుమారు 700 మీటర్ల మేర ముందుకు సాగినట్లు ప్రాజెక్టు బృందం మంత్రికి వివరించింది. ఇందులో అవుట్‌లెట్‌ వైపు సుమారు 450 మీటర్లు, ఇన్‌లెట్‌ వైపు 250 మీటర్ల మేర పనులు పూర్తయ్యాయని తెలిపింది.తీవ్రమైన భూగర్భ పరిస్థితులు, సాంకేతిక సమస్యలు, యంత్రాల వినియోగం, తవ్విన రాళ్లు, మట్టిని బయటకు తరలించడంలో ఎదురైన ఇబ్బందులను అధిగమిస్తూ ఈ పురోగతి సాధించినట్లు అధికారులు వివరించారు.

అదనపు యంత్రాలతో పనుల్లో వేగం

సొరంగం పనులను మరింత వేగవంతం చేసేందుకు అదనపు యంత్రాలను రంగంలోకి దించాలని మంత్రి ఉత్తమ్‌ కుమార్‌రెడ్డి అధికారులను ఆదేశించారు. తవ్విన రాళ్లు, మట్టిని సొరంగం నుంచి బయటకు తరలించే వ్యవస్థను మెరుగుపరచాలని సూచించారు. పనుల్లో వేగం పెంచడంతో పాటు కార్మికుల భద్రతకు అత్యంత ప్రాధాన్యం ఇవ్వాలని స్పష్టం చేశారు.గతంలో ప్రమాదం జరిగిన ప్రాంతంలోని బలహీన శిలల మండలాన్ని అధిగమించడం కీలక ముందడుగు అని, ఇకపై పనుల పురోగతిని నిరంతరం పర్యవేక్షిస్తూ నిర్ణీత గడువులోగా ప్రాజెక్టును పూర్తి చేసేందుకు చర్యలు తీసుకోవాలని అధికారులకు సూచించారు.

2028 జూన్ నాటికి నీటిని అందించడమే లక్ష్యం

ఎస్‌ఎల్‌బీసీ ప్రాజెక్టు ద్వారా ఉమ్మడి నల్లగొండ జిల్లాలోని మెట్ట ప్రాంతాలకు 30 టీఎంసీలకు పైగా నీటిని అందించడమే ప్రభుత్వ లక్ష్యమని మంత్రి తెలిపారు. ఈ ప్రాజెక్టు పూర్తయితే ఏళ్ల తరబడి ఈ ప్రాంతాన్ని వేధిస్తున్న సాగు, తాగునీటి సమస్యలకు పరిష్కారం లభిస్తుందని పేర్కొన్నారు.2028 జూన్‌ నాటికి నీటిని అందించేలా పక్కా కార్యాచరణ రూపొందించాలని, పనుల పురోగతిని ఎప్పటికప్పుడు సమీక్షిస్తూ అడ్డంకులను అధిగమించాలని అధికారులను ఆదేశించారు.

కీలక ప్రాజెక్టులపై సమీక్ష

ఉమ్మడి నల్లగొండ జిల్లాలోని నీటిపారుదల ప్రాజెక్టుల అమలుపై నిర్వహించిన ఈ సమీక్షలో ఎంపీలు కె. రఘువీర్‌రెడ్డి, చామల కిరణ్‌కుమార్‌రెడ్డి, ఎమ్మెల్యేలు మందుల సామేల్‌, కె. జైవీర్‌రెడ్డి, వేముల వీరేశం, అనిల్‌ కుమార్‌రెడ్డి, ఎమ్మెల్సీ శంకర్‌ నాయక్‌ పాల్గొన్నారు.నీటిపారుదల శాఖ కార్యదర్శి ఈ. శ్రీధర్‌, ఇంజినీర్‌ ఇన్‌ చీఫ్‌ ఓ.వి. రమేష్‌బాబు, సూర్యాపేట, నల్లగొండ, యాదాద్రి భువనగిరి, మహబూబాబాద్‌ జిల్లాల కలెక్టర్లు, ఇతర ఉన్నతాధికారులు సమీక్షలో పాల్గొని ప్రాజెక్టు పురోగతి, పనుల అమలుపై వివరాలు అందించారు.ఎస్‌ఎల్‌బీసీ సొరంగం పనుల్లో ఎదురవుతున్న సవాళ్లను అధిగమిస్తూ, వేగం పెంచి నిర్ణీత గడువులోగా ప్రాజెక్టును పూర్తి చేయాలని మంత్రి ఉత్తమ్‌ కుమార్‌రెడ్డి అధికారులకు దిశానిర్దేశం చేశారు.

#SLBC #SLBCTunnel #UttamKumarReddy #TelanganaIrrigation #Nalgonda #Srisailam #TelanganaNews #IrrigationProjects #VSRBreakingNews