కేసీఆర్ సంచలనం…గవర్నర్ స్పీచ్ లేకుండా అసెంబ్లీ

తెలంగాణ ముఖ్యమంత్రి చంద్రశేఖర్ రావు మరో సారి సంచలన నిర్ణయం తీసుకున్నారు. బీజేపీతో అమీతుమీ తేల్చుకోవడానికి ఆయన సిద్ధమయ్యారు. కేంద్ర ప్రభుత్వాన్ని లెక్క చేయనన్న సంకేతాలను ఆయన బలం ఇచ్చారు. రాష్ట్రాలపైన చిన్న చూపు చూస్తున్న మోదీ సర్కార్ కు సహకరించబోనన్న విషయాన్ని కేసీఆర్ స్పష్టం చేస్తున్నారు. గత కొన్ని రోజులుగా బీజేపీపైన విరుచుకుపడుతున్న ఆయన ప్రత్యక్ష పోరాటానికి సై అన్నారు. ముందుగా రాష్ట్ర గవర్నర్ తలపడటానికి ఆయన సిద్ధమయ్యారు. గత కొన్ని రోజులుగా గవర్నర్ తమిళ సై తో గ్యాప్ మెయింటెన్ చేస్తున్న కేసీఆర్ ఇప్పుడు డైరెక్ట్ ఫైట్ కు రెఢీ అన్న సిగ్నల్స్ ఇచ్చారు. మార్చి 7 నుంచి జరగబోయే అసెంబ్లీ బడ్జెట్ సమావేశాలకు గవర్నర్ ఆహ్వానించవద్దని కేసీఆర్ నిర్ణయించారు. గవర్నర్ ప్రసంగం లేకుంటే శాసనసభను ప్రారంభించనున్నారు. తెలంగాణ ఏర్పడిన తర్వాత గవర్నర్ ప్రసంగం లేకుండా బడ్జెట్ సమావేశాలు ప్రారంభం కావడం ఇదే మొదటి సారి. ఉమ్మడి రాష్ట్ర చరిత్రలో కేవలం రెండే సార్లు ఇలా జరిగిందని సమాచారం. అసెంబ్లీ బడ్జెట్ సమావేశాలకు ముందు ఉభయ సభలను ఉద్దేశించి గవర్నర్ ప్రసంగించడం సాంప్రదాయంగా వస్తోంది. అయితే ఈ సారి ఆ ఆనవాయితీకి బ్రేక్ వేయాలని కేసీఆర్ నిర్ణయించారు. గవర్నర్ ప్రసంగం తప్పనిసరి కాకపోవడం,కేవలం సాంప్రదాయం కావడం వల్లనే సిఎం ఇలాంటి ఆలోచనకు వచ్చినట్లు తెలుస్తోంది.

రాష్ట్ర గవర్నర్ తమిళసై కి, ప్రభుత్వానికి మధ్య గత కొన్నాళ్లు ప్రచ్ఛన్న యుద్ధం కొనసాగుతోంది. అంత తీవ్రమైన అంశాలు కాకపోవడం వల్ల ఈ అంశంపైన చర్చ జరగడం లేదు. అయితే ఎమ్మెల్సీగా పాడి కౌషిక్ రెడ్డిని గవర్నర్ కోటాలో నామినేట్ చేయకపోవడంతో కేసీఆర్ ఆగ్రహానికి గురైనట్లు సమాచారం. గవర్నర్ తమిళ సై బీజేపీ నేతల సూచనల ప్రకారం కౌషిక్ రెడ్డి విషయంలో నిర్ణయం తీసుకోకుండా పెండింగ్ లో ఉంచారని సిఎం భావిస్తున్నారు. హుజూరాబాద్ ఎన్నికల్లో బీజేపీకి లబ్ది కల్గేలా గవర్నర్ వ్యవహార శైలి ఉందన్నది కేసీఆర్ ఆలోచన. గవర్నర్ తీరు కారణంగా పాడి కౌషిక్ రెడ్డిని మరో కోటాలో ఎమ్మెల్సీగా ఎంపిక చేయాల్సి వచ్చింది. ఇటీవల రాజ్ భవన్ లో జరిగిన రిపబ్లిక్ దినోత్సవానికి కూడా కేసీఆర్ హాజరుకాలేదు. దీనిపైన కూడా చర్చ జరిగింది. తాజాగా మేడారం జాతరకు గవర్నర్ తమిళసైకి ప్రభుత్వం హెలికాఫ్టర్ సమకూర్చలేదు. జాతరలో ప్రొటొకాల్ పాటించలేదు. గవర్నర్ కు మంత్రులు, కలెక్టర్, ఎస్పీ ఎవరూ స్వాగతం పలకలేదు. దీంతో తమిళ సై నొచ్చుకున్నట్లు తెలుస్తోంది.

మొత్తానికి బీజేపీతో బలమైన పోరాటం చేయబోతున్నాన్న సంకేతాలను తెలంగాణ ప్రజలకు పంపడం కోసమే గవర్నర్ కేసీఆర్ గిల్లికజ్జాలు పెట్టుకుంటున్నారని కాంగ్రెస్ ఆరోపిస్తోంది. అసెంబ్లీ సాంప్రదాయాలను ముంటగలపడం మంచి పద్దతి కాదని ఆ పార్టీ నేతలంటున్నారు. మరో వైపు గవర్నర్ ను కేసీఆర్ అవమానించారని బీజేపీ వర్గాలంటున్నాయి. కేసీఆర్ ఈ వ్యూహాం ఎంత మేరకు ఫలితాలను ఇస్తుందో చూడాలి.