రామేశ్వరరావు టీవీలో రేవంత్ రెడ్డి

మల్కాజ్ గిరి ఎం.పి రేవంత్ రెడ్డి, మైహోం సంస్థల అధినేత జూపల్లి రామేశ్వరరావు మధ్య పచ్చగడ్డి వేస్తే భగ్గుమంటుందన్న విషయం అందరికి తెలిసిందే. మైహోం  సంస్థలపైన రేవంత్ రెడ్డి అనేక కేసులు వేశారు. ముఖ్యమంత్రి కేసీఆర్ కు రామేశ్వరరావు బినామీ అన్న విమర్శలు చేస్తున్నారు. రేవంత్ రెడ్డి ఆరోపణలపైన రామేశ్వరరావు పరువు నష్టం దావా కూడా వేశారు. ఈ కేసు ప్రస్తుతం కోర్టు విచారణలో ఉంది. మైహోం సంస్థ నిర్మాణాల మీద రేవంత్ రెడ్డి పెద్ద ఎత్తున ఆయా సంస్థలకు ఫిర్యాదులు కూడా చేశారు. ఇదే సమయంలో రామేశ్వరరావు ఆధ్వర్యంలో నడుస్తున్న టీవీ9,10టీవీల్లో రేవంత్ రెడ్డికి వ్యతిరేకంగా అనేక కథనాలను ప్రసారం చేశారు. అయితే ఊహించని విధంగా పరిణామాలు మారుతున్నాయి. రేవంత్ రెడ్డి వాసన కూడా పడని రామేశ్వరరావు ఆయనతో రాజీ ప్రయత్నాలు చేస్తున్నట్లుగా ప్రచారం జరుగుతోంది. దీనికి అనుగుణంగానే రేవంత్ రెడ్డి  జూపల్లికి చెందిన 10 టీవీలో కనిపించబోతున్నారు. ఆయనతో ఆ ఛానల్ ప్రత్యేక చర్చ కార్యక్రమాన్ని ఏర్పాటు చేసింది. రేవంత్ రెడ్డి 10 టీవీలో కనిపించబోవడం ఆయన అభిమానులతో పాటు రాజకీయ వర్గాల్లో ఆసక్తికి దారితీసింది. అయితే రాజకీయాల్లో శాశ్వత శత్రువులు, శాశ్వత మిత్రులు ఉండరన్న విషయాన్ని అంతా గుర్తు పెట్టుకోవాలి.