ఈటెలకు వెన్నుపోట్లు
మంత్రి వర్గం నుంచి బర్త్ రఫ్ అయిన ఈటెల రాజేందర్ పైన టీఆర్ఎస్ నాయకత్వం కత్తికట్టింది. ఆయనను మరింత బలహీనం చేయడానికి తీవ్రంగా ప్రయత్నాలు చేస్తోంది. ఈటెలను ఒంటరి చేయడానికి గులాబీ నాయకత్వం స్కెచ్ లు వేస్తోంది. హుజూరాబాద్ నియోజకవర్గంలో ఆయనను గట్టిగా దెబ్బతీయడానికి కేసీఆర్ పథకం రూపొందిస్తున్నారు. ఆయన బలగాన్ని,బలాన్ని కూకటి వేళ్లతో సహా పెకిలించి వేసి రాజకీయ భవిష్యత్తు లేకుండా చేయడానికి దాడి ప్రారంభించారు. కేడర్ ను ఛిన్నభిన్నం చేయడం ద్వారా ఆయనను దెబ్బతీయడానికి దందయాత్రలు మొదలు పెట్టారు. ప్రధానంగా ఈటెలకు ఇన్నాళ్లు అండగా నిలిచిన ద్వితీయ శ్రేణి నేతలను టీఆర్ఎస్ పార్టీ తమ వైపు తిప్పుకుంటోంది. క్షేత్ర స్థాయిలో ఈటెల కోసం పనిచేస్తున్న వారిపైన గులాభీ నాయకత్వం ఫోకస్ పెట్టింది. ఈటెల రాజేందర్ త్వరలో టీఆర్ఎస్ పార్టీకి గుడ్ బై చెప్పనున్నారు. కరోనా హడావుడి తగ్గిన తర్వాత పార్టీకి రాజీనామా చేయాలని ఆయన భావిస్తున్నారు. దీంతో పాటు ఎమ్మెల్యే పదవి కూడా ఆయన రిజైన్ చేస్తారు. సాధారణ ఎన్నికలకు మరో రెండేళ్లపైగా సమయం ఉండటంతో హుజూరాబాద్ కు బై ఎలక్షన్ ఖచ్చితంగా వస్తుంది. కేసీఆర్ ను సవాల్ చేస్తు ఆయనకు వ్యతిరేకంగా పెద్ద రాజకీయ వేదికను తయారు చేయడానికి ఈటెల సిద్ధమౌతున్నారు. అందుకే ఆయనను ఆదిలోనే తుంచి వేయడానికి టీఆర్ఎస్ ప్రయత్నాలు ముమ్మరం చేసింది. ముందుగా హుజూరాబాద్ లో ఈటెలను ఓడిస్తే సగం పని పూర్తవుతుందని ఆ పార్టీ అంచనా. సొంత నియోజకవర్గంలో గెల్వలేని వాడు కేసీఆర్ పైన ఏం పోరాటం చేస్తాడన్న భావన కల్గించాలన్నది గులాబీ పార్టీ వ్యూహాం. అందుకే హుజూరాబాద్ కేంద్రంగా పాలిటిక్స్ ప్రారంభమయ్యాయి. గత ఇరవై యేళ్లుగా ఈటెలకు అండగా నిలుస్తున్న ద్వితీయ శ్రేణి నాయకులపైన టీఆర్ఎస్ ఫోకస్ పెట్టింది. ఒక్కొక్కరిని తమ వైపు తిప్పుకునేందుకు చర్చలు జరుపుతోంది. మంత్రి గంగుల కమలాకర్, మాజీ ఎం.పి వినోద్ రావు ఈ ఆపరేషన్ నిర్వహిస్తున్నారు. జడ్పీటీసీలు,ఎంపిపిలు, మున్సిపల్ ఛైర్మన్లు, మార్కెట్ కమిటి ఛైర్మన్ లు టీఆర్ఎస్ లోనే కొనసాగేలా వీరు ఒప్పిస్తున్నారు. తాగా హుజూరాబాద్ మున్సిపల్ చైర్ ప‌ర్స‌న్ గందే రాధిక, వైస్ చైర్మ‌న్ కొలిపాక నిర్మ‌ల, వ్య‌వ‌సాయ మార్కెట్ క‌మిటీ చైర్ ప‌ర్స‌న్ ర‌మ యాదగిరి నాయక్, కౌన్సిలర్లు మంత్రి గంగుల కమలాకర్ తో భేటీ అయ్యారు.తాము ఈటెల వెంట వెళ్లడం లేదని వీరు ప్రకటించారు. టీఆర్ఎస్ లో గెలిచామని, ఆ పార్టీలోనే కొనసాగుతామని స్పష్టం చేశారు. తమ నాయకుడు కేసీఆర్ మాత్రమేనని వీరు తేల్చి చెపుతున్నారు.
హుజూరాబాద్ నియోజకవర్గంలోని మరో మున్సిపాలిటీలో కూడా ఈటెల రాజేందర్ కు ఎదురుదెబ్బ తగిలింది. జమ్మికుంట మున్సిపల్ ఛైర్మన్ తో పాటు కొందరు కౌన్సిలర్లు టీఆర్ఎస్ లోనే కొనసాగుతామని ప్రకటించారు. మంత్రి గంగులతో ఛైర్మన్ తక్కళ్లపల్లి రాజేశ్వర్ రావు సమావేశమయ్యారు.
వీరితో పాటు మరింత మంది టీఆర్ఎస్ ప్రజా ప్రతినిధులను తమ వైపు తిప్పుకోవడానికి ప్రయత్నాలు ముమ్మరమయ్యాయి. ఈటెలను పూర్తిగా బలహీనం చేయడం ద్వారా రాజకీయ భవిష్యత్తు లేకుండా చేయాలని పట్టుదలగా ఉన్నారు. అయితే రాజేందర్ మాత్రం నాయకుల ఫిరాయింపులు, వెన్నుపోట్లను ముందే ఊహించారు. అధికార పార్టీ నుంచి ప్రలోభాలు, బెదిరింపులు వస్తున్నాయని ఆయన ఇప్పటికే ప్రకటించారు కూడా. అందుకే ఆయన హుజూరాబాద్ ఓటర్లపైన ఆశలు పెట్టుకున్నారు. మరి ఈ ఆపరేషన్ లో ఎవరిది పనిచేయి అవుతుందో చూడాలి.
