ఇదే పసుపు బోర్డు.. ఎంపి అర్వింద్ పైన సెటైర్లు

నిజామాబాద్ బీజేపీ ఎంపి ధర్మపురి అర్వింద్ పైన బీఆర్ఎస్ ఎదురుదాడిని కొనసాగిస్తూనే ఉంది. తాజాగా ఆయనపైన నిజామాబాద్ లో హోర్డింగ్స్ వెలిశాయి. మా ఎంపిగారు తెచ్చిన పసుపు బోర్డు ఇదేనంటు నగరవ్యాప్తంగా బోర్డులను ఏర్పాటు చేశారు. వ్యంగ్యంగా ఉన్న ఈ హోర్డింగ్స్ ను నిజామాబాద్ జనం ఆసక్తిగా చూస్తున్నారు. గెలిచిన తర్వాత ఐదు రోజుల్లో పసుపు బోర్డు తీసుకువస్తానని అర్వింద్ ఒక బాండు పేపర్ రాసిచ్చారు. అయితే ఆయన ఇప్పటి వరకు పసుపు బోర్డు తీసుకురాలేదని బీఆర్ఎస్ వర్గాలు ఆరోపిస్తున్నాయి. ఈ విషయంలో అనేక సార్లు అర్వింద్, ఎమ్మెల్సీ కవిత మధ్య మాటల యుద్దం జరిగింది. ఎట్టి పరిస్థితుల్లోనూ అర్వింద్ ను ఓడించి తీరుతానని కవిత శపథం చేశారు. ఈ నేపథ్యంలో పసుపు బోర్డు పైన బీఆర్ఎస్ ఎప్పటికప్పుడు ప్రశ్నిస్తూనే ఉంది. తాజాగా నిజామాబాద్ లో బోర్డులు ఏర్పాటు చేసి అర్వింద్ ను మరింత టార్గెట్ చేసింది.