రేవంత్ రెడ్డి పైన సీనియర్ల ఆరోపణల్లో నిజమెంత..?

               తెలంగాణ కాంగ్రెస్ లోని పలువురు సీనియర్ నాయకులు పీసీసీ చీఫ్ రేవంత్ రెడ్డిపైన తిరుగుబాటు ప్రకటించారు. రేవంత్ రెడ్డి వ్యవహార శైలిపైన తీవ్ర స్థాయిలో ఆరోపణలు గుప్పించారు. పార్టీ కమిటీల్లో టీడీపీ నుంచి వచ్చిన వారికి పెద్ద పీఠ వేశారని, కాంగ్రెస్ లో పుట్టిన పెరిగిన వారికి అన్యాయం చేస్తున్నారని వారు ధ్వజమెత్తారు. మాజీ పీసీసీ చీఫ్ ఉత్తమ్ కుమార్ రెడ్డి, సిఎల్పీ నేత భట్టి విక్రమార్క, ఎమ్మెల్యే జగ్గారెడ్డి,మాజీ ఎంపి మధు యాష్కీ, మాజీ ఎమ్మెల్యే మహేశ్వర్ రెడ్డి తదితరులు రేవంత్ రెడ్డి వైఖరీపైన అధిష్టానానికి ఫిర్యాదు చేస్తామని స్పష్టం చేశారు. పీసీసీ కార్యవర్గంలో యాభై శాతానికి పైగా తెలుగుదేశం నుంచి వచ్చిన నాయకులున్నారని వారు ఆరోపించారు. మరో వైపు కాంగ్రెస్ సీనియర్లు చేస్తున్న విమర్శలను రేవంత్ రెడ్డి వర్గం తోసిపుచ్చింది. కమిటీల్లో కాంగ్రెస్ లో పుట్టిన పెరిగిన వారే తొంభై శాతం మంది ఉన్నారని జాబితాను విడుదల చేశారు.